INTERVENCIÓNS SOBRE O ESPAZO NO CUARTO DE FILO (en colaboración co CGAC de Compostela)

Experiencia de intervención na aula de filosofía.

Como complemento da charla que tivemos sobre arte contemporánea a cargo do CGAC a pasada semana, hoxe rematamos a edición das fotografías que fixemos durante esta sesión. Faltan agora os vosos comentarios que podedes facer abaixo. 

GLOSARIO VISITA DIDÁCTICA EN LIÑA UN ACHEGAMENTO Á ARTE CONTEMPORÁNEA. O CGAC E A SÚA COLECCCIÓN

 

 

Arte efémera: É unha arte baseada na creación de obras que existen por un determinado lapso de tempo. É unha arte pasaxeira, non dura no tempo, existe nun momento preciso.

Site specific: Este termo refírese a un tipo de traballo artístico deseñado para un lugar en particular e que ten unha interrelación única cun espazo, situación ou contexto determinado. Se se traslada a outro lugar perde parte ou o total da súa esencia.

 

Instalación: É un conxunto de elementos que conforman unha obra realizada cos máis variados materiais, soportes e disciplinas (pintura, fotografía, vídeo, son, performance...) e que inclúe o propio espazo (paredes, chan, luces...) como elemento de creación. En moitas ocasións o espectador é convidado a moverse ao redor da obra, a adentrarse nela ou a interactuar coa peza. En moitos casos motivan a percepción sensorial do público máis aló da vista apelando tamén ao oído, ao gusto, ao tacto ou ao olfacto.

 

Arte figurativa: A arte figurativa representa persoas, obxectos e formas que son reconocibles, que imitan a realidade. A figuración pode ser máis ou menos realista. Non esixe na persoa que observa ningún esforzo para comprendelo.

 

Arte abstracta: En lugar de representar figuras concretas e reconocibles do mundo real (como fai a arte figurativa), propón unha realidade distinta a través dunha linguaxe propia e independente de formas, cores e liñas. Non representa elementos concretos da natureza senón que propón unha nova realidade.

 

Arte expresionista: A arte expresionista esaxera, deforma e terxiversa a realidade facéndoa subxectiva. Busca plasmar a realidade pero non imitándoa, non de xeito similar a ela, senón de forma pasional, desenfreada, brusca, tentando reflectir a intimidade, o sentimento, a emoción e a visión interior do artista. Busca unha experiencia emocional. O seu obxectivo é tamén espertar emocións no espectador. Non hai respecto pola perspectiva, nin as formas, nin a iluminación. As cores son fortes, estridentes, violentas, artificiais, as pinceladas enérxicas e as texturas esaxeradas.

Performance: As performances son accións artísticas que se desenvolven nun lugar determinado durante un tempo concreto. Combínanse elementos de diversos campos como a música, a danza, o teatro e as artes plásticas. A performance lévase a cabo en vivo e existe mentres o artista realiza a súa proposta. As accións poden ser documentadas (en vídeo, fotografía, escritos...) e ser expostas.